Þann 6. sept.s.l. rann upp sýningardagur Vélhjólaíþróttafélags Reykjaness á krakkaakstri og var það liður í að kynna þessa frábæru íþrótt fyrir almenningi á Suðurnesjum.
Kvöldið áður hafði Arnar í Hellusteini komið og gert barnabraut á malarvellinum við Hringbraut eins og honum einum er lagið og var ekki lengi að.
Að morgni laugardagsins mættu allir krakkarnir ásamt fylgdarliði og voru sumir svefnvana af spenningi.
Byrjað var á að ganga brautina eins og gjarnan er gert áður en akstur hefst. Síðan var farið í hjólaskoðin og fór hún fram á gangstéttinni fyrir framan malarvöllinn, vöktu krakkarnir töluverða athygli vegfarenda og ekki laust við að einhverjir bílstjórar hafi snúið sig úr hálsliðnum í forundran auk þess sem fólk þusti út úr nærliggjandi húsum og hjólhýsum til að berja dýrðina augum. Þessir frábæru púkar okkar sýndu síðan mjög góðan og agaðan snilldarakstur og voru í alla staði til fyrirmyndar og voru sportinu til mikils sóma.
Að lokum fengu allir viðurkenningu og óhætt er að segja að þessi uppákoma hafi vakið mikla lukku.

Kveðja
Stjórn VÍR