Fyrir rétt um viku síðan var opnað á slóðasvæðið í Bolaöldu og var það gert með þeim tilmælum að fólk virti ákveðnar umgengisreglur sem meðal annars fólu í sér að stækka ekki núverandi slóða þó pollar væru fyrir í slóðunum, heldur að slá af og aka rólega í gegnum þá ef hægt væri.  Nú hefur komið í ljós að þessi tilmæli hafa almennt verið virt að vettugi og hafa sumir slóðar breikkað gífurlega í tilraunum ökumanna að blotna ekki í fæturnar eða að bleyta ekki hjólin sín þar sem sneitt hefur verið framhjá pollunum.  Því miður stórsér á vestari hluta svæðisins eftir þennan akstur og nú er svo komið að VÍK neyðist hugsanlega til að loka þessum hluta svæðisins fyrir allri umferð með róttækum aðgerðum.  Í nánast öllum tilvikum hefði verið hægt að slá verulega af og aka rólega í gegnum pollana.  Þannig að VÍK biðlar enn og aftur til skynsemi manna svo ekki þurfi að koma til slíkrar lokunaraðgerða sem er öllum til ama og fáum til gagns.  Þannig í stað þess að hugsa um það eitt að aka um svæðið eins og ein risastór „barbiedúkka“ sem ekki má blotna, að ökumenn slái af og aki rólega í gegnum þess polla í stað þess að búa til breiðari slóða framhjá þessum „hindrunum“.

Það er spáð ágætis veðri næstu daga og þurrk, þannig að pollarnir ættu að hverfa á næstu dögum.  Svæðið má ekki við því að slóðarnir verða að breidd eins og tvöföld Reykjanesbraut…