Önnur EnduroKross keppnin var haldin í gær í Reiðhöllinni. Fjöldi fólks lagði leið sína í höllina að þessu sinni og fylgdist með baráttunni. 25 manns voru skráðir til keppni, allir bestu ökumenn landsins sem allir ætluðu sér stóra hluti. Brautin sem lögð var á laugardaginn með samstilltu átaki fjölda góðra manna bauð upp meiri hraða en í fyrstu keppninni. Grjótkaflinn ógurlegi sem stoppaði marga þá hafði verið gerður aðeins viðráðanlegri – en þó langt frá því að vera auðveldur. Keppendum var skipt í þrjá hópa og eftir tvö moto fóru sex efstu menn áfram í lokariðil en næstu átta þar á eftir þurftu að fara í Síðasta séns moto.

Mikil barátta og hörkukeppni á milli manna einkenndi lokakeppnina, sérstaklega var gaman að fylgjast með jaxlinum Hauki Þorsteinssyni sem keyrði brautina alltaf á jöfnum hraða í fremsta hóp. Hann lét sér aldrei bregða þó einn og einn hraðari ökumaður kæmist fram úr (Einar #4 🙂 heldur pikkaði hann aftur upp í næstu eða þar næstu þraut! En það var Kári Jónsson sem enn og aftur sýndi mikla yfirburði og hreinlega skildi restina af hópnum eftir í tvígengisbrælu. Hann leit aldrei til baka og rúllaði keppnina hreinlega upp. Haukur endaði í öðru sæti þar á eftir og Einar Sigurðarson endaði í þriðja sæti eftir snilldarleg tilþrif. Kristófer Finnsson fékk svo Tilþrifaverðlaun dagsins fyrir að ýta hjólinu sínu keðjulausu í gegnum brautina við góðar undirtektir áhorfenda.

Vélhjólaíþróttaklúbburinn þakkar keppendum og áhorfendum fyrir þátttökuna. Einnig viljum við þakka öllum þeim fjölmörgu sem hjálpuðu við brautarlagninguna og keppnishaldið í gær, án ykkar væri þetta ekki hægt. Einnig viljum við þakka þeim fyrirtækjum og einstaklingum sem lögðu til tæki og ómetanlega aðstoð í kringum keppnina s.s. Hreinsun og flutningar, Viggó Viggósson, Marinó/Dráttarbílar, Eysteinn/Suðurverk, Hekla, JHM-sport, og svo auðvitað Nítró og N1 sem styrktu keppnina dyggilega. Síðast ber þó að þakka snillingnum Guðbjarti Stefánssyni sem hannaði brautina og verkstýrði brautarlagningunni eins og herforingi

Keli