Það var þvílíkur mannfjöldi í Bolaöldubrautinni í kvöld að annað eins hefur ekki sést lengi. Það var ekki annað að heyra en að menn væru að fíla breytingarnar sem er besta mál. Helga og Bína grilluðu borgara og pulsur fyrir alla sem vildu – hvað getur það verið betra? Brautin verður opin á morgun og föstudag en lokuð á laugardagsmorguninn til 14.
Fyrsta endurokeppnin verður haldin á Bolaöldusvæðinu 16. maí nk. eftir miklar vangaveltur um aðra staðsetningu. Þorlákshafnarsvæðið var inni í myndinni en enduronefnd komst að þeirri niðurstöðu að svæðið hentaði ekki fyrir keppni að svo stöddu. Af því tilefni verður vinnudagur á laugardagsmorguninn frá kl. 10 til 13. Það þarf að mála og snyrta húsið, týna rusl, laga girðingar, týna grjót úr brautinni og margt fleira eftir veturinn. Öll hjálp er því gríðarlega vel þegin, málningarsköfur, penslar og önnur áhöld koma að góðum notum. Grillið verður heitt og þeir sem vinna um morguninn hjóla frítt í brautinni frá kl. 13 en brautin opnar fyrir aðra kl. 14. Vonumst til að sjá sem flesta þá.
Aðalfundur VÍK var haldinn í gærkvöldi, 25. mars. Framkvæmd voru helstu aðalfundarstörf s.s. farið yfir reikninga og skýrslu stjórnar og kosið í nefndir og stjórn. Tveir nýir menn bættust í stjórn, þeir Hrafn Guðbergsson og Ólafur Þór Gíslason en Kristján A. Grétarsson vék úr stjórn. Hrafnkell Sigtryggsson var endurkjörinn formaður eins og aðrir stjórnarmenn. Skýrsla stjórnar, reikningar félagsins, fundargerð aðalfundar og helstu atriði fundarins má lesa hér. Ágæt mæting var á fundinn og sköpuðust góðar umræður í lok fundarins.