Hér er allt um keppnir, keppnishald og úrslit
Minnum á að skráning í MX Akranes lýkur í kvöld. Betra að vera tímalega ef eitthvað vesen kemur upp.
Skráning á MSÍ HÉR
Skagamenn eru búnir að vinna mjög mikið í svæðinu hjá sér og eru farnir að skáka mörgum stærri klúbbum hvað aðstöðu og starf varðar. Nú er bara að fjölmenna og hafa góðann dag. Ekki er það nú heldur verra að brautin hjá þeim er moldarbraut. Bara gaman og ekki síður fyrir áhorfendur.
Óli
Keppendur fengu frábært veður og krefjandi braut í Sólbrekku í dag. Jói, Gylfi og félagar lögðu flotta braut sem kom keppendum skemmtilega á óvart í dag. Það var lítið um hvíld og eins gott að vera vakandi enda allskonar færi í boði.
Eins og oft áður var það einn maður sem átti daginn en Kári Jónsson keyrði brautina létt og átti enginn séns í kappann í dag. Guðbjartur Magnússon gerði sitt besta og leit vel út en hafði bara ekki hraðann. Signý Stefánsdóttir keyrði vel í kvennaflokki og endaði fyrst með Anitu Hauksdóttur í 2. sæti. Í tvímenning sigruðu Helgi Már og Hlynur Örn Hrafnkelssynir, í 40+ sigraði Ernir Freyr Sigurðsson og Haraldur Björnsson vann B flokkinn á fullu húsi. Nánari úrslit eru hér fyrir neðan.
Í ljósi mikillar fækkunar keppenda í Enduro CC hefur stjórn MSÍ tekið ákvörðun um breytingar á keppnishaldinu fyrir árið 2013.
Um er að ræða eftirfarandi breytingar. ECC-1 og ECC-2 flokkar verða sameinaðir í einn flokk, ECC Meistaraflokkur og verður lágmarksþáttökufjöldi 5 keppendur til þess að flokkurinn sé löglegur til Íslandsmeistara.
40+, B flokkur og Tvímenningur verða óbreyttir og í þessa flokka þarf að lágmarki 5 keppendur (5 lið í Tvímenning) til þess að flokkarnir séu löglegir til Íslandsmeistara.
Undanþága verður með Kvennaflokk og 85cc flokk þar sem að lágmarki 3 keppendur þurfa að vera í flokk til þess að flokkarnir séu löglegir til Íslandsmeistara.
3 keppnisdagar af 4 keppnisdögum telja til lokaúrslita í Íslandsmótinu. Þetta þýðir að keppandi getur sleppt einum keppnisdegi eða „núllað“ slakasta keppnisdaginn.
Stjórn MSÍ. 19. júní. 2013
Við renndum í Sólbrekku með borða fyrir Jóa og tókum brautina út í leiðinni. Þetta verður bara skemmtilegt, brautin liggur þvers og kruss um svæðið. Startið verður á startsvæðinu og þaðan liggur brautin inn í og þvert yfir krossbrautina á nokkrum stöðum á skemmtilegan hátt. Þaðan í gegnum moldarkafla og þúfur af öllum stærðum með viðkomu í háum hólum sem umkringja brautina. Fullt af brölti og krefjandi leiðum en fært fyrir alla og vel það. Enn á eftir að setja borða á stikur og í beygjur á nokkrum stöðum og týna grjót hér og þar. Jói verður með vinnukvöld í vikunni og væri mjög sáttur ef menn koma og hjálpa til – þeim mun fleiri þeim mun minna mál. Og btw, krossbrautin er frábæru standi og því um að gera að renna suðureftir og hjálpa til og hjóla smá í leiðinni. Svo er bara að muna að skrá sig fyrir kl. 21 á þriðjudaginn (ekki klikka á því að mánudagurinn er frídagur 🙂
Og hér er hjálmavideo frá Jóa – reyndar e-h vesen á hljóðinu í upphafi en bíddu aðeins og þá kemur tústrókurinn inn
Íslandsmótið í Enduro CC mun hefjast með 1. og 2. umferð laugardaginn 22. júní í Sólbrekku við Grindavík. Kalt vor hefur heldur betur sett strik í reikninginn hvað varðar keppnishaldið í Enduro CC þetta árið og aflýsa varð fyrstu keppnishelginni sem átti að vera í byrjun maí. Önnur keppnishelgin átti svo að vera á Akureyri 15. júní en vegna ástandsins á akstursíþróttasvæði KKA vegna bleytu hefur einnig þurft að aflýsa þeirri keppni. Mótaröðin mun því byrja með 1. og 2. umferð laugardaginn 22. júní, 3. og 4. umferðin fer svo fram við Egilstaði 27. júlí, 5. og 6. umferðin á Suðurlandi í nágrenni Reykjavíkur (+100 km.) 31. ágúst og 7. og 8 umferðin mun svo fara fram á Akureyri.
Eins og í fyrra munu 3 bestu keppnisdagar gilda til Íslandsmeistaraúrslita, sem þýðir að keppendur geta sleppt einum keppnisdegi eða keppt í öllum keppnum ársins og slakasti árangur telur ekki til endanlegra úrslita. Stjórn MSÍ harmar þær aðstæður sem upp hafa komið en því miður getum við lítið gert þegar kemur að því að eiga við æðri máttarvöld. Það er von stjórnar MSÍ að við sjáum ykkur sem flest á komandi keppnistímabili og að við eigum eftir að eiga saman frábært Enduro CC sumar þrátt fyrir þessa erfiðleika við að byrja nýtt spennandi tímabil.
Fyrsta umferðin í Íslandsmótinu í Motocrossi fór fram á Selfossi í dag. Það er óhætt að segja að veðrið hafi spilað stórt hlutverk í keppninni í dag en miklar rigningar undanfarna daga og í nótt gerðu keppnina að drullukeppni fyrir allan peninginn. Selfyssingar brugðu á það ráð að stytta brautina fyrir keppni og klippa út blautasta kaflinn sem bjargaði heilmiklu. Það breytti þó ekki því að brautin var á floti og hrikalega erfið. Keppendur kvörtuðu þó ekki og skemmtu sér stórkostlega.
Kári Jónsson, Íslandsmeistari í Enduro í fyrra var eins og á heimavelli og sigraði daginn í MX-Open á fullu húsi stiga en Viktor Guðbergsson, Íslandsmeistarinn í Motocrossi 2012, varð í öðru sæti. Lesa áfram Drullugaman í 1. umferð Íslandsmótsins í Motocrossi á Selfossi