Bryndís Einarsdóttir náði 13. sæti í Heimsmeistarakeppninni í Þýskalandi í dag. Fyrir vikið fékk hún 8 stig í keppninni sem er hennar langbesti árangur. Við náðum sambandi við Einar Smárason, pabba Bryndísar, í dag og sagði hann að Bryndís hafi mætt vel stemmd til leiks. Í gær var hún agressív í startinu en lenti í árekstri í fyrstu beygju og „týndi“ hjólinu… það hafði rúllað niður brekku og útúr brautinni. Hún stóð á fætur og náði að vinna sig uppí 24.sæti eftir góðan akstur.
Í morgun náði hún mun betra starti, var í kringum 10. sætið frá upphafi og var í baráttu um 10-13 sæti allan tímann. Hún endaði í 13.sæti eins og áður sagði.
Nú er að hefjast sumarfrí í kvennakeppninni og svo eru tvær umferðar eftir. Næsta umferð er í Tékklandi 8. ágúst og lokaumferðin verður á Ítalíu í september. Bryndís verður í Belgíu allan tíman fram að keppninni og heldur auðvitað áfram að æfa.
Ólafsfirðingar héldu sitt fyrsta Íslandsmót í motocrossi í dag. Mótið heppnaðist mjög vel og virðast allir ánægðir með framkvæmdina og aðstöðuna fyrir norðan. Brautin er sandbraut sem grófst talsvert mikið og reyndi það á leikni manna og hjólin. Eitthvað var um úrbræddar kúplingar og þvíumlíkt. Einar Sigurðarson kláraði kúplinguna hjá sér eftir góðan akstur í dag og Gylfi Freyr Guðmundsson náði ekki að klára seinna mótoið eftir góðan akstur í dag. Það er skemmst frá því að segja að Íslandsmeistarinn frá því í fyrra, Aron Ómarsson, sigraði í báðum motounum í MX1 flokki með talsverðum yfirburðum. Þetta var fyrsta mótið með nýju fyrirkomulagi þar sem aðeins eru tvö moto sem eru 25mín + 2 hringir.